هو احنا مين بيحكمنا؟ السؤال ده بيطرح نفسه على دماغى كتير اوى اليومين دول ، هو مين ريسنا؟ هو احنا اصلا لينا رئيس؟ ، من صغرى والسيد الرئيس " محمد حسنى مبارك" اطال الله عمره وبقائه هو ريسنا ، حتى لما درست تاريخ فى الثانوى وامتحنونا فيه قالولنا هو ريسنا طول عمرنا ، اتولدنا ومفيش غيره قدامنا ، وحتى بعد ما يقابل وجه كريم- وهو فى عز شبابه- بعد عمر طويل يارب ، اسمه هايفضل دايما معانا فى وجود ابنه رمز الشباب حبيبنا جمال محمد حسنى مبارك ، المهم دلوقتى محدش بيسمع حاجة عن ريسنا ، هو ريسنا فين ؟ اصل انا كل يوم بفتح الجرايد واتفرج على القنوات كل يوم على مصايب بتحصل فى البلد ، ولا الحكومة بتطلع تتكلم ، ولا ريسنا حبيبنا بيقول حاجة ، طب هو فين؟
لما الثانوية العامة تحصل فيها فضايح ، وولاد الناس ياخدوا الامتحانات على الجاهز ، وولاد "......" الشعب – محدش يفهمنى غلط- يكعوا اللى وراهم واللى قدامهم فى الفاضى ، خصوصا ان وزير التعليم ذو الرؤية التعليمية العالية حالف يمين طلاق بالتلاتة ماحد حايجيب مجموع اكتر من 70% السنة دى ، والناس والعة وشايطة ، الريس مظهرش ليه عشان يهتم بالمسالة دى شخصيا ؟ هو برضه مش العيال بتوع الثانوى دول مصريين وهو رئيس مصر؟
لما يبقى الناس محبوسين فى العقبة مش لاقيين سفن تجيبهم بلدهم ، ولا عارفين يرجعوا تانى من الحتة الى جايين منها ، والناس متبهدلة اخر بهدلة ، الريس ليه ما امرش وزارة الخارجية بالاهتمام بالموضوع، مش الناس دى برضه معاهم الجنسية المصرية ، وهو رئيس مصر؟
لما ازمة العيش مستمرة ، والناس مش لاقية عيش ، ولو لقته يبقى غير صالح للاستخدام الآدمي ، وطويل التيلة- ربنا يوقف نموه- اعلن من تلات شهور ان المشكلة هاتتحل فى شهر ، الريس ليه ماتدخلش عشان يحل المشكلة ، او يحاسب رئيس الوزرا على كلامه الكذب ؟ ولا ايه الحكاية؟
لما الناس فى عز الحر اللى احنا فيه مش لاقية نقطة مية واحنا فى بلد النيل ، وقاعدين يصرخوا فى كل حتة ، عطشان ياصبايا دلونى على الرئيس ، ولا حياة فيمن تنادى.
لما الناس ماشية تقتل بعضها فى كل حتة ، وبقى عادى تتخانق مع واحد ، وعشان تاخد حقك تروح تجيب عيلتك وجيرانك وبالبنادق والرشاشات تروح تقتل فى اهل اللى اتخانقت معاه ، والشرطة فى خدمة الشرطة والهليبة اللى بيسرقوا البلد ،انما الشعب ابن " ...." الشعب – برضه بتفهم غلط- يموت مش مشكلة ، ليه ريسنا حبيبنا مش بيخرج يحاسب الشرطة انها ساكتة ومش بتتكلم ولا بتحفظ الامن فى البلد ، هو احنا مش فى مصر برضه؟
لما الاخ القصير المكير ابن العز قاعد يسرق فى اموال الناس الغلابة ، ويحتكر الحديد ويرفع سعره ، وبالتالى رفع اسعار كل حاجة تانية ، ومحدش قادر يحاسبه ، ليه هو مطلعش يحاسبه؟ ولا احمد عز مثلا معاه جنسية امريكانى ؟
حاجات كتير اوى عاوزة اقولها بس المشكلة مش حالاقى مساحة اكتبها ، بس برضه محدش جاوبنى ، هو احنا فين ريسنا ؟ انا اخر مرة سمعت ان لينا ريس كانت من فترة لما قالولنا ان الريس بتاعنا عمل حلوان و 6 اكتوبر محافظات ، ولو انى لغاية دلوقتى مش فاهمة الحكمة العليا من القرار ده ، بس اكيد مدام هو اللى عمله يبقى حلو ، وكمان بعدها سمعت ان الريس احتفل بعيد ميلاده ، وصل 80 سنة ماشاء الله ربنا يديم عليه الصحة ، وطلعت بقى الجرايد الحلوة الجميلة اللى بطلت اشتريها عشان انا وحشة وما ستحقش اشترى الدرر دى ، طلعت الجرايد وقالت ان يوم عيد ميلاد ريسنا هو " يوم ان ولدت مصر" ، طب انا طول عمرى اعرف ان مصر بقالها اكتر من 7 آلاف سنة مولودة ، يبقى الريس عنده 8 آلاف سنة؟ طب هو فين طول المدة دى ؟ مش بيظهر ليه؟ مش بيتدخل فى شئون الدولة ليه؟ مش بيحاسب الحرامية والمرتشين ليه؟ مش بيطلب من الناس تتقى ربنا ليه؟ هو برضه مش من اولى الامر؟ مش هو احنا برضه كمصريين مسئولين منه وحايتحاسب بسببنا؟ ولا هو نسى ؟ ولا احنا من نوع وهو من نوع ؟
ياناس حد يقولى مين ريسنا؟ مين بيحكمنا ؟ لما نخاطب حد هانخاطب مين؟ يامبن يجيبل ريس اقدر اقول الراجل ده بيحكمنا؟
الحدق يفهم:
من الواضح عشان يبقى لينا رئيس اننا نغير جنسيتنا ، او نروح نطلب اللجوء السياسى لدولة فلسطين ، ماهو مش بيهتم الا بيها ، انما الشعب ابن "...." مصر –تانى بتفهم غلط- مش لازمه فى حاجة ، ولا ايه؟
لما الثانوية العامة تحصل فيها فضايح ، وولاد الناس ياخدوا الامتحانات على الجاهز ، وولاد "......" الشعب – محدش يفهمنى غلط- يكعوا اللى وراهم واللى قدامهم فى الفاضى ، خصوصا ان وزير التعليم ذو الرؤية التعليمية العالية حالف يمين طلاق بالتلاتة ماحد حايجيب مجموع اكتر من 70% السنة دى ، والناس والعة وشايطة ، الريس مظهرش ليه عشان يهتم بالمسالة دى شخصيا ؟ هو برضه مش العيال بتوع الثانوى دول مصريين وهو رئيس مصر؟
لما يبقى الناس محبوسين فى العقبة مش لاقيين سفن تجيبهم بلدهم ، ولا عارفين يرجعوا تانى من الحتة الى جايين منها ، والناس متبهدلة اخر بهدلة ، الريس ليه ما امرش وزارة الخارجية بالاهتمام بالموضوع، مش الناس دى برضه معاهم الجنسية المصرية ، وهو رئيس مصر؟
لما ازمة العيش مستمرة ، والناس مش لاقية عيش ، ولو لقته يبقى غير صالح للاستخدام الآدمي ، وطويل التيلة- ربنا يوقف نموه- اعلن من تلات شهور ان المشكلة هاتتحل فى شهر ، الريس ليه ماتدخلش عشان يحل المشكلة ، او يحاسب رئيس الوزرا على كلامه الكذب ؟ ولا ايه الحكاية؟
لما الناس فى عز الحر اللى احنا فيه مش لاقية نقطة مية واحنا فى بلد النيل ، وقاعدين يصرخوا فى كل حتة ، عطشان ياصبايا دلونى على الرئيس ، ولا حياة فيمن تنادى.
لما الناس ماشية تقتل بعضها فى كل حتة ، وبقى عادى تتخانق مع واحد ، وعشان تاخد حقك تروح تجيب عيلتك وجيرانك وبالبنادق والرشاشات تروح تقتل فى اهل اللى اتخانقت معاه ، والشرطة فى خدمة الشرطة والهليبة اللى بيسرقوا البلد ،انما الشعب ابن " ...." الشعب – برضه بتفهم غلط- يموت مش مشكلة ، ليه ريسنا حبيبنا مش بيخرج يحاسب الشرطة انها ساكتة ومش بتتكلم ولا بتحفظ الامن فى البلد ، هو احنا مش فى مصر برضه؟
لما الاخ القصير المكير ابن العز قاعد يسرق فى اموال الناس الغلابة ، ويحتكر الحديد ويرفع سعره ، وبالتالى رفع اسعار كل حاجة تانية ، ومحدش قادر يحاسبه ، ليه هو مطلعش يحاسبه؟ ولا احمد عز مثلا معاه جنسية امريكانى ؟
حاجات كتير اوى عاوزة اقولها بس المشكلة مش حالاقى مساحة اكتبها ، بس برضه محدش جاوبنى ، هو احنا فين ريسنا ؟ انا اخر مرة سمعت ان لينا ريس كانت من فترة لما قالولنا ان الريس بتاعنا عمل حلوان و 6 اكتوبر محافظات ، ولو انى لغاية دلوقتى مش فاهمة الحكمة العليا من القرار ده ، بس اكيد مدام هو اللى عمله يبقى حلو ، وكمان بعدها سمعت ان الريس احتفل بعيد ميلاده ، وصل 80 سنة ماشاء الله ربنا يديم عليه الصحة ، وطلعت بقى الجرايد الحلوة الجميلة اللى بطلت اشتريها عشان انا وحشة وما ستحقش اشترى الدرر دى ، طلعت الجرايد وقالت ان يوم عيد ميلاد ريسنا هو " يوم ان ولدت مصر" ، طب انا طول عمرى اعرف ان مصر بقالها اكتر من 7 آلاف سنة مولودة ، يبقى الريس عنده 8 آلاف سنة؟ طب هو فين طول المدة دى ؟ مش بيظهر ليه؟ مش بيتدخل فى شئون الدولة ليه؟ مش بيحاسب الحرامية والمرتشين ليه؟ مش بيطلب من الناس تتقى ربنا ليه؟ هو برضه مش من اولى الامر؟ مش هو احنا برضه كمصريين مسئولين منه وحايتحاسب بسببنا؟ ولا هو نسى ؟ ولا احنا من نوع وهو من نوع ؟
ياناس حد يقولى مين ريسنا؟ مين بيحكمنا ؟ لما نخاطب حد هانخاطب مين؟ يامبن يجيبل ريس اقدر اقول الراجل ده بيحكمنا؟
الحدق يفهم:
من الواضح عشان يبقى لينا رئيس اننا نغير جنسيتنا ، او نروح نطلب اللجوء السياسى لدولة فلسطين ، ماهو مش بيهتم الا بيها ، انما الشعب ابن "...." مصر –تانى بتفهم غلط- مش لازمه فى حاجة ، ولا ايه؟
هناك تعليق واحد:
جميلة وافكارك جميلة
إرسال تعليق